រដ្ឋាភិបាលកម្ពុជា តាមរយៈគណៈកម្មាធិការជាតិសម្រាប់ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិហៅកាត់ថា គ.ជ.អ.ប. គណៈកម្មាធិការ បានប្រកាសដាក់ឱ្យអនុវត្តជាផ្លូវការនូវផែនការរយៈពេល ៥ឆ្នាំ ដំណាក់កាលទី២ (២០២៦-២០៣០) នៃកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដើម្បីបន្តរុញច្រានកំណែទម្រង់វិមជ្ឈការ និងវិសហមជ្ឈការ ឱ្យកាន់តែស៊ីជម្រៅ ក្នុងគោលបំណងលើកកម្ពស់សេដ្ឋកិច្ច មូលដ្ឋាន និងគុណភាពជីវិតប្រជាពលរដ្ឋ។
​
នៅក្នុងឱកាសនោះ ឯកឧត្តមអភិសន្ដិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) បានអំពាវនាវដល់សាធារណជន ដៃគូអភិវឌ្ឍន៍ អង្គការសង្គមស៊ីវិល និងវិស័យឯកជន ចូលរួមគាំទ្រ និងអនុវត្តផែនការនេះឱ្យសម្រេចបានជោគជ័យ។ ផ្អែកលើស្មារតីនៃផែនការថ្មីនេះ ឯកឧត្តមអភិសន្តិបណ្ឌិត ស សុខា បានដាក់ចេញនូវអនុសាសន៍គន្លឹះមួយចំនួន ទៅកាន់បណ្ដាតួអង្គពាក់ព័ន្ធ។ 

ឯកឧត្តមអភិសន្តិបណ្ឌិត បានសង្កត់ធ្ងន់ពីការពន្លឿនការផ្ទេរមុខងារ និងថវិកា ដោយក្រសួងស្ថាប័នពាក់ព័ន្ធ ត្រូវរុញច្រានការផ្ទេរមុខងារ និងធនធានហិរញ្ញវត្ថុទៅឱ្យរដ្ឋបាលថ្នាក់ក្រោមជាតិឱ្យបានលឿន ព្រមទាំងបង្កើនការបណ្តុះបណ្តាលសមត្ថភាពមន្ត្រីមូលដ្ឋាន ដើម្បីធានាការទទួលខុសត្រូវខ្ពស់ ខណៈការលើកកម្ពស់សេវាច្រកចេញចូលតែមួយ តួអង្គពាក់ព័ន្ធ ត្រូវបន្តយកចិត្តទុកដាក់ផ្តល់សេវាសាធារណៈឱ្យបានលឿន មានតម្លាភាព គ្មានការរើសអើង និងបើកទូលាយឱ្យសាធារណជន និងសង្គមស៊ីវិលចូលរួមតាមដានត្រួតពិនិត្យ។ 

ជាមួយគ្នានេះដែរ ឯកឧត្តមអភិសន្តិបណ្ឌិត ស សុខា បានណែនាំអំពីការពង្រឹងកិច្ចសហការអន្តរក្រសួង ដោយបង្កើនការសម្របសម្រួលរវាងក្រសួង និងស្ថាប័នពាក់ព័ន្ធ ដើម្បីធានាថាថវិកាអភិវឌ្ឍន៍ត្រូវបានប្រើប្រាស់ចំគោលដៅ និងមានប្រសិទ្ធភាពបំផុត ស្របពេលដែលការចាត់ទុកកំណែទម្រង់ជាស្នូលយុទ្ធសាស្ត្រ គ្រប់តួអង្គត្រូវបន្តដៅយកកំណែទម្រង់អភិបាលកិច្ចថ្នាក់ក្រោមជាតិ ជាស្នូលនៃយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល ព្រោះវាជាប់ពាក់ព័ន្ធផ្ទាល់នឹងជីវភាពប្រចាំថ្ងៃរបស់ប្រជាពលរដ្ឋ។ 

​សូមបញ្ជាក់ថា ការដាក់ចេញផែនការ ៥ឆ្នាំ ដំណាក់កាលទី២ (២០២៦-២០៣០) នេះ ធ្វើឡើងក្នុងគោលបំណងពង្រឹងប្រព័ន្ធអភិបាលកិច្ចថ្នាក់ក្រោមជាតិ ឱ្យមានសមត្ថភាព គណនេយ្យភាព និងភាពម្ចាស់ការខ្ពស់ ក្នុងការឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋនៅតាមមូលដ្ឋាន។ ការដាក់ចេញផែនការនេះ ជាការប្រតិបត្តិស្របតាមយុទ្ធសាស្ត្របញ្ចកោណរបស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតឈ្លាសវៃរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ឈរលើមូលដ្ឋាននៃមរតកដឹកនាំរបស់សម្ដេចតេជោអតីតនាយករដ្ឋមន្ត្រី ដើម្បីធ្វើយ៉ាងណាឱ្យប្រជាពលរដ្ឋទទួលបានភាពកក់ក្ដៅពីការបម្រើសេវាសាធារណៈ៕

ក្នុងឱកាសអញ្ជើញជាអធិបតីបិទព្រឹត្តិការណ៍ប្រកួតកីឡាឆ្លងកាត់ឧបសគ្គ ពានរង្វាន់ ឯកឧត្តមអភិសន្តិបណ្ឌិត ស សុខា និងលោកជំទាវ និងកាត់ខ្សែបូដាក់ឱ្យប្រើផ្ទាំងរូបភាព កម្ពុជាស្រឡាញ់សន្តិភាព ទស្សនាក្បួនព្យុហយាត្រា និងសកម្មភាពអន្តរាគមន៍របស់និស្សិតនគរបាល នៅបណ្ឌិត្យសភានគរបាលកម្ពុជា នាព្រឹកថ្ងៃទី១៧ ខែឧសភា ឆ្នាំ២០២៦ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបង្ហាញការពេញចិត្ត កោតសរសើរ និងអបអរសាទរចំពោះលទ្ធផលជោគជ័យ នៃការប្រកួតកីឡាឆ្លងកាត់ឧបសគ្គ វគ្គផ្តាច់ព្រ័ត្រ នៅបណ្ឌិតសភានគរបាលកម្ពុជា។ 

បើតាមឯកឧត្តមអភិសន្តិបណ្ឌិត នេះជាលើកទីមួយហើយ ដែលបណ្ឌិត្យសភានគរបាលកម្ពុជា បានរៀបចំព្រឹត្តិការណ៍ប្រកួតកីឡាឆ្លងកាត់ឧបសគ្គនេះឡើង ដើម្បីឆ្លុះបញ្ចាំងអំពីលទ្ធផលនៃការបណ្តុះបណ្តាលកម្លាំងកាយសម្បទា ស្មារតីអត់ធ្មត់ ភាពវៃឆ្លាត និងសាមគ្គីភាពផ្ទៃក្នុងរបស់កងកម្លាំងនគរបាលជាតិ ដែលជាកត្តាគន្លឹះដ៏សំខាន់ក្នុងការបំពេញភារកិច្ចបម្រើជាតិនិងប្រជាជន។ 

យោងតាមរបាយការណ៍ឯកឧត្តមនាយឧត្តមសេនីយ៍ សាស្ត្រាចារ្យ ឯក មនោសែន ប្រធានបណ្ឌិត្យសភានគរបាលកម្ពុជា ព្រឹត្តិការណ៍ប្រកួតកីឡាឆ្លងកាត់ឧបសគ្គនេះ ត្រូវបានរៀបចំឡើងចាប់ពីថ្ងៃទី១១ ដល់ថ្ងៃទី១៣ ខែឧសភា ឆ្នាំ២០២៦ ក្នុងគោលបំណងបង្កលក្ខណៈឱ្យនិស្សិត និងសិស្សនគរបាល បានចូលរួមប្រកួតប្រជែងបញ្ចេញសមត្ថភាពស្របតាមលក្ខណៈបច្ចេកទេស។ 

ឯកឧត្តមប្រធានបណ្ឌិត្យសភា បានបន្តថា ក្នុងដំណើរការដំបូង មានកីឡាករ កីឡាការិនី មកពីបណ្ឌិត្យសភានគរបាលកម្ពុជា សាលានគរបាលជាតិមិត្តភាពកម្ពុជា-វៀតណាម និងសាលានគរបាលជាតិភូមិភាគទាំង៦ បានស្ម័គ្រចិត្តចូលរួមហ្វឹកហាត់បច្ចេកទេសសរុបចំនួន ២៥២នាក់ (នារី ១២៥នាក់)។ តាមរយៈការហ្វឹកហាត់ និងការជម្រុះកម្រិតបឋម គណៈកម្មការបានជ្រើសរើសបេក្ខជនឆ្នើមបានចំនួន ៧២នាក់ (នារី ៣២នាក់) ដោយបែងចែកជា ៣ប្រភេទវិញ្ញាសា រួមមាន៖ ទី១. ការប្រកួតជាក្រុមបុរស-នារី ចំនួន ៥៦នាក់ (នារី ២៤នាក់) ដោយបែងចែកជា ៨ក្រុម ទី២. ការប្រកួតឯកត្តជនបុរស (កីឡាករ ៨នាក់)។ ទី៣ ការប្រកួតឯកត្តជននារី (កីឡាការិនី ៨នាក់)។ 

ចំពោះវិញ្ញាសាប្រកួតវិញ ត្រូវបានរៀបចំឡើងចំនួន ១៩ឧបសគ្គ តម្រូវឱ្យបត់បែនទៅតាមស្ថានភាពជាក់ស្ដែង ដោយប្រើប្រាស់កាយសម្បទារឹងមាំ ភាពវៃឆ្លាត ការគោរពវិន័យ ការសម្រេចចិត្តក្នុងស្ថានភាពលំបាក និងការទទួលខុសត្រូវខ្ពស់។ ឧបសគ្គទាំងនោះ រួមមាន៖ របាំងទាប កៅអីបង្អែកវែង តុវែង បង្អួច ជណ្តើរយោល ជញ្ជាំងមានបំពង់ទីប ស្ពានយោល ជណ្តើរស្វា បន្លាលួស ស្នួខ្សែពួរ ស្នួឆ្លងអគារ រថយន្តក្រុង ខ្សែពួរផ្លោះអូរ ផ្ទះសិប្បនិម្មិត ខ្សែកាបទោល ខ្សែកាបភ្លោះ ការដោះរៀបអាវុធ AK-47 ខ្សែកាបស្រប និងវិញ្ញាសាចុងក្រោយគឺ ការសម្រូតខ្សែរ៉តរំលងស្រះ។ 

ចំពោះលទ្ធផល គណៈកម្មការប្រកួត បានជម្រុះយកតែចំណាត់ថ្នាក់លេខ១ លេខ២ និងលេខ៣ ដោយកីឡាករឆ្នើមទាំងបីចំណាត់ថ្នាក់នេះ ទទួលបានពាននិងរង្វាន់លើកទឹកចិត្ត រួមមាន៖ ទីមួយ. ការប្រកួតជាក្រុមបុរស-នារី ចំណាត់ថ្នាក់លេខ១ ទទួលបានពានមាស មេដាយមាស ថវិកា៣លានរៀល លេខ២ ពានប្រាក់ មេដាយប្រាក់ ថវិកា២លានរៀល លេខ៣ ពានសំរឹទ្ធ មេដាយសំរឹទ្ធ ថវិកា១លានរៀល រីឯក្រុមដែលមិនទទួលបានចំណាត់ថ្នាក់ នឹងទទួលបានថវិកា ៥០ម៉ឺនរៀលក្នុង១ក្រុម។ 

ចំណែកទី២ គឺការប្រកួតឯកត្តជនបុរស ចំណាត់ថ្នាក់លេខ១ ទទួលបានពានមាស មេដាយមាស ថវិកា១លានរៀល លេខ២ ពានប្រាក់ មេដាយប្រាក់ ថវិកា៨០ម៉ឺនរៀល  លេខ៣ ពានសំរឹទ្ធ មេដាយសំរឹទ្ធ ថវិកា៥០ម៉ឺនរៀល។ រីឯកីឡាករដែលមិនទទួលបានចំណាត់ថ្នាក់ នឹងទទួលបានថវិកា ២០ម៉ឺនរៀល។ ៣.ការប្រកួតឯកត្តជននារី ចំណាត់ថ្នាក់លេខ១ ទទួលបានពានមាស មេដាយមាស ថវិកា១លានរៀល លេខ២ ពានប្រាក់ មេដាយប្រាក់ ថវិកា៨០ម៉ឺនរៀល  លេខ៣ ពានសំរឹទ្ធ មេដាយសំរឹទ្ធ ថវិកា៥០ម៉ឺនរៀល។ រីឯកីឡាករ ដែលមិនទទួលបានចំណាត់ថ្នាក់ ទទួលបានថវិកា ២០ម៉ឺនរៀល។ 

ប្រមុខក្រសួងមហាផ្ទៃ បានថ្លែងនូវការអបអរសាទរ និងលើកទឹកចិត្តដល់កីឡាករកីឡា កីឡាការិនី ដែលទទួលបានជ័យលាភី ត្រូវបន្តខិតខំប្រឹងប្រែងអភិវឌ្ឍសមត្ថភាពបន្ថែមទៀត។ ដោយឡែក សម្រាប់កីឡាករ កីឡាការិនី ដែលមិនទាន់ទទួលបានជ័យលាភី ឯកឧត្តមអភិសន្តិបណ្ឌិត បានដាស់តឿនមិនឱ្យមានការបាក់ទឹកចិត្តឡើយ ពោលគឺត្រូវសិក្សាស្វែងយល់បទពិសោធពីការប្រកួត និងពិនិត្យរាល់ចំណុចខ្វះខាតរបស់ខ្លួន ដើម្បីយកទៅកែខៃ វាយតម្លៃ និងបង្កើនការហ្វឹកហាត់បន្ថែមទៀត សំដៅត្រៀមខ្លួនដណ្តើមជោគជ័យក្នុងការប្រកួតព្រឹត្តិការណ៍ក្រោយៗទៀត។
 

ឯកឧត្តមអភិសន្តិបណ្ឌិត ឧបនាយករដ្ឋមន្ត្រី បានបង្ហាញក្តីសង្ឃឹមថា តាមរយៈការប្រកួតនេះ កីឡាករ កីឡាការិនី នឹងមានឱកាសចូលរួមការប្រកួតក្នុងកម្រិតប្រហាក់ប្រហែលគ្នានេះ ក្នុងវិស័យកងទ័ព ដែលរៀបចំដោយក្រសួងការពារជាតិ ឬក្រសួងមហាផ្ទៃនាពេលខាងមុខ។ ដូច្នេះ គុណផលដែលសម្រិតសម្រាំង និងទទួលបាននាឱកាសនេះ គឺពិតជាធនធានដ៏មានតម្លៃមិនអាចកាត់ថ្លៃបាន ក្នុងការចូលរួមចំណែកលើកកម្ពស់សមត្ថភាពកងកម្លាំងនគរបាលជាតិ ឱ្យកាន់តែមានភាពរឹងមាំ ម៉ឺងម៉ាត់ និងទាន់សម័យ សំដៅធានាបាននូវប្រសិទ្ធភាពខ្ពស់ក្នុងការបំពេញភារកិច្ចការពារជាតិ សន្តិសុខសង្គម និងបម្រើប្រជាពលរដ្ឋឱ្យកាន់តែល្អប្រសើរឡើង។ 

ក្នុងឱកាសនោះដែរ ឯកឧត្តមអភិសន្តិបណ្ឌិត ឧបនាយករដ្ឋមន្ត្រី ក៏បានថ្លែងរម្លឹកដោយក្តីក្តុកក្តួល និងដឹងគុណយ៉ាងជ្រាលជ្រៅបំផុត ចំពោះគុណបំណាច់ដ៏ធំធេងមិនអាចកាត់ថ្លៃបានរបស់វីរកងទ័ព និងវីរនគរបាលជាតិគ្រប់ជំនាន់ ដែលបានលះបង់សាច់ស្រស់ឈាមស្រស់ និងបូជាជីវិត ដើម្បីបុព្វហេតុការពារមាតុភូមិ ថែរក្សាសុខសន្តិភាព ស្ថិរភាពសង្គម និងសណ្តាប់ធ្នាប់សាធារណៈ ជូនជាតិមាតុភូមិ និងប្រជាពលរដ្ឋរហូតមកដល់សព្វថ្ងៃ។ 

សូមបញ្ជាក់ថា ក្នុងពិធីដ៏ឡារិកនោះដែរ ឯកឧត្តមឧបនាយករដ្ឋមន្ត្រី ក៏បានអញ្ជើញកាត់ខ្សែបូដាក់ឱ្យប្រើប្រាស់ជាផ្លូវការនូវ ផ្ទាំងរូបភាព កម្ពុជាស្រឡាញ់សន្តិភាព ព្រមទាំងបានអញ្ជើញទស្សនាការសម្តែងក្បួនព្យុហយាត្រា និងសកម្មភាពអន្តរាគមន៍បង្ក្រាបបទល្មើសផ្សេងៗរបស់និស្សិតនគរបាល យ៉ាងរស់រវើក និងប្រកបដោយភាពម៉ឺងម៉ាត់ ដែលក្បួនព្យុហយាត្រាមានចំនួន៨ផែន ទី១ ផែនកាន់ទង់ជាតិ ទី២ ផែននិស្សិតបរិញ្ញាបត្រឆ្នាំទី៤ ទី៣ ផែននិស្សិតបរិញ្ញាបត្រឆ្នាំទី៣ ទី៤ ផែននិស្សិតបរិញ្ញាបត្រឆ្នាំទី២ ទី៥ ផែននិស្សិតបរិញ្ញាបត្រឆ្នាំទី១ ទី៦ ផែនអន្តរាគមន៍ប្រដាប់ដោយអាវុធ AK-47 ទី៧ ផែននារីក្នុងឯកសណ្ឋានហ្វឹកហាត់ ប្រដាប់ដោយអាវុធ AK-47 និងទី៨ ផែនបុរសក្នុងឯកសណ្ឋានហ្វឹកហាត់ប្រដាប់ដោយអាវុធ AK-47៕

នៅព្រឹកថ្ងៃព្រហស្បតិ៍ ទី៣០ ខែមេសា ឆ្នាំ២០២៦ សម្តេចតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា អនុញ្ញាតជូនលោកជំទាវ វ្លាដាំងកា អាន់ឌ្រេវ៉ា (Vladanka Andreeva) អ្នកសម្របសម្រួលអង្គការសហប្រជាជាតិ តែងតាំងថ្មីប្រចាំនៅកម្ពុជា ចូលជួបសម្ដែងការគួរសម នៅវិមានសាមគ្គីភាពនៃព្រឹទ្ធសភាជាតិ ៕ a

ខេត្ត កំពង់ស្ពឺ៖ ខណៈអាជ្ញាធរកម្ពុជាកំពុងបង្ក្រាបទីតាំងឆបោកតាមអនឡាញយ៉ាងតឹងរឹងនៅតាមបណ្តាខេត្តនានា ជាពិសេសនៅក្រុង ប៉ោយប៉ែត ខេត្ត បន្ទាយមានជ័យ មានជនបរទេសមួយចំនួនបានគេចខ្លួន និងចល័តទៅកាន់តំបន់ផ្សេងៗដែលពួកគេគិតថាមានសុវត្ថិភាព។ ក្នុងនោះ ខេត្តកំពង់ស្ពឺ ត្រូវបានកំណត់ជាគោលដៅមួយសម្រាប់លាក់ខ្លួន។ ដើម្បីទប់ស្កាត់បញ្ហានេះ កម្លាំងជំនាញនៃស្នងការដ្ឋាននគរបាលខេត្តកំពង់ស្ពឺ ដឹកនាំដោយលោក ឃឹម សុកខៃ ឧត្តមសេនីយ៍ទោ ស្នងការនគរបាលខេត្ត បានបើកប្រតិបត្តិការចុះអន្តរាគមន៍ និងត្រួតពិនិត្យការចល័តជនបរទេសនៅក្នុងភូមិសាស្ត្រខេត្ត។

យោងតាមប្រភពព័ត៌មាន នាយប់ថ្ងៃទី២៩ ខែមេសា ឆ្នាំ២០២៦ កម្លាំងសមត្ថកិច្ចបានធ្វើការឆែកឆេរ និងត្រួតពិនិត្យគ្រប់មធ្យោបាយដឹកជញ្ជូន ដោយបានឃាត់ខ្លួនជនបរទេសជាច្រើននាក់ បញ្ជូនមកកាន់ស្នងការដ្ឋាននគរបាលខេត្ត ដើម្បីធ្វើការសាកសួរ និងចាត់វិធានការតាមនីតិវិធីច្បាប់។

លោក ឃឹម សុកខៃ បានបញ្ជាក់ថា ប្រតិបត្តិការនេះអនុវត្តតាមបទបញ្ជាយ៉ាងម៉ឺងម៉ាត់របស់លោក ជាម ច័ន្ទសោភ័ណ អភិបាលខេត្តកំពង់ស្ពឺ ដោយមានគោលដៅបោសសម្អាតបទល្មើសគ្រប់ប្រភេទ ជាពិសេសបទល្មើសឆបោកតាមប្រព័ន្ធបច្ចេកវិទ្យា (Online Scam) ឲ្យអស់ពីខេត្ត។អាជ្ញាធរក៏បានអំពាវនាវឱ្យប្រជាពលរដ្ឋ ដែលមានអាគារ ផ្ទះសំណាក់ ឬទីតាំងជួលឲ្យជនបរទេស សហការជាមួយអាជ្ញាធរ និងរាយការណ៍ព័ត៌មានពាក់ព័ន្ធ ដើម្បីអាចត្រួតពិនិត្យ និងទប់ស្កាត់

ត្បូងឃ្មុំ ៖ ដោយអនុវត្តតាមបទបញ្ជាយ៉ាងម៉ឺងម៉ាត់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងឯកឧត្តម ប៉ែន កុសល្យ អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តត្បូងឃ្មុំ ដោយមានការសម្របសម្រួលពីនីតិវិធីដោយតំណាងអយ្យការអមសាលាដំបូងខេត្តត្បូងឃ្មុំបនិងការបញ្ជាដឹកនាំផ្ទាល់របស់លោកឧត្តមសេនីយ៍ទោ ចិន នី ស្នងការនគរបាលខេត្តត្បូងឃ្មុំ កម្លាំងគណៈបញ្ជាការឯកភាពរដ្ឋបាលខេត្តត្បូងឃ្មុំ ដែលមានកម្លាំងនគរបាលខេត្ត កងរាជអារុធហត្ថខេត្ត សហការជាមួយកម្លាំងនាយកដ្ឋានព្រហ្មទណ្ឌ នៃអគ្គស្នងការដ្ឋាននគរបាលជាតិ បានចុះធ្វើរដ្ឋបាលចំហរត្រួតពិនិត្យតាមផ្ទះល្វែង ផ្ទះវីឡា និងអគារដែលមានការសង្ស័យលបលួចប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams) នៅតាមផ្ទះល្វែង ផ្ទះវីឡា និងតាមអគារ ស្ថិតក្នុងភូមិត្រពាំងផ្លុងទី១ ឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ នៅថ្ងៃទី២៩ ខែមេសា ឆ្នាំ២០២៦ ។

ក្នុងប្រតិបត្តិការខាងលើ កម្លាំងចម្រុះខេត្តត្បូងឃ្មុំ បានចុះទៅឃើញទីតាំងមួយ ដែលពាក់ព័ន្ធលបលួចប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams ) និង២ទីតាំងទៀត មានជនបរទេសរស់នៅប្រមូលផ្ដុំ ដោយក្នុងរង្វង់ប្រតិបត្តិការនេះ កម្លាំងជំនាញបានឃាត់ខ្លួនមនុស្សប្រមាណ ២១២នាក់ ស្រី ៣៩នាក់ ក្នុងនោះមានជនជាតិចិន ១៩២នាក់ ស្រី ២៤នាក់ ជនជាតិមីយ៉ាន់ម៉ា ស្រី ០៣នាក់ ជនជាតិវៀតណាម ១០នាក់ ស្រី ០៧នាក់ និងជនជាតិខ្មែរ ០៧នាក់ ស្រី ០៥នាក់ ផងដែរ ។

សមត្ថកិច្ចកំពុងបន្តនីតិវិធី ដើម្បីកំណត់មុខសញ្ញាអ្នកដែលពាក់ព័ន្ធបទល្មើស អ្នកដែលមិនជាប់ពាក់ព័ន្ធ និងស្រាវជ្រាវរកទីតាំងលបលួចប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា

“ជនជាតិថៃចំនួន ៦៣៥ នាក់ដែលពាក់ព័ន្ធនឹងការឆបោកតាមប្រព័ន្ធបច្ចេកវិទ្យា (Online Scams) និងបណ្តាញឧក្រិដ្ឋកម្មឆ្លែងដែន ត្រូវបានបណ្តេញចេញទៅប្រទេសថៃនៅថ្ងៃទី៣០ ខែមេសា ឆ្នាំ២០២៦ នេះតាមច្រកទ្វារអន្តរជាតិប៉ោយប៉ែត ខេត្តបន្ទាយមានជ័យក្រោយពីសមត្ថកិច្ចបានបំពេញបែបបទស្របតាមច្បាប់នៃព្រះរាជាណាចក្រកម្ពុជា”។ 

ឯកឧត្តមឧត្តមសេនីយ៍ឯក សម វណ្ណវីរៈ អគ្គស្នងការរងនគរបាលជាតិកម្ពុជា ដែលដឹកនាំប្រតិបត្តិការនេះ បានឱ្យដឹងបន្ថែមថា៖ “ចំណែកជនសង្ស័យចំនួន ៣០នាក់ ត្រូវបានសមត្ថកិច្ចកម្ពុជាបាននិងកំពុងរៀបចំអនុវត្តនីតិវិធីច្បាប់បន្តចំពោះបទល្មើសដែលបានប្រព្រឹត្តទាក់ទងនឹងការឆបោកតាមប្រព័ន្ធបច្ចេកវិទ្យា។ ការបណ្តេញចេញជនជាតិថៃនេះត្រូវបានធ្វើឡើងដោយមានការសម្របសម្រួល សហការរវាងសមត្ថកិច្ចកម្ពុជា និងថៃ”។

គួរបញ្ជាក់ថានៅថ្ងៃទី២៥ ខែមេសា ឆ្នាំ២០២៦ កម្លាំងប្រតិបត្តិការចម្រុះរបស់កម្ពុជា ក្រោមការដឹកនាំរបស់អគ្គស្នងការដ្ឋាននគរបាលជាតិ និងដោយមានការសម្របសម្រួលនីតិវិធីពីអយ្យការអមសាលាដំបូងខេត្តបន្ទាយមានជ័យ បានបង្ក្រាបទីតាំងមួយជាអគារខុនដូ នៅក្រុងប៉ោយប៉ែត ខេត្តបន្ទាយមានជ័យ ដែលពាក់ព័ន្ធនឹងការប្រព្រឹត្តអំពើឆបោកតាមប្រព័ន្ធបច្ចេកវិទ្យា (Online Scams) និងបណ្តាញឧក្រិដ្ឋកម្មឆ្លងដែន។

តាមលទ្ធផលបឋម អាជ្ញាធរកម្ពុជាបានរកឃើញវត្ថុតាងជាច្រើន រួមមាន ទូរស័ព្ទដៃ ៤ ៦៨៥គ្រឿង Monitor ចំនួន ៤១៦គ្រឿង និងឧបករណ៍ពាក់ព័ន្ធផ្សេងៗ។ ការត្រួតពិនិត្យឧបករណ៍អេឡិចត្រូនិកក៏បានរកឃើញវេបសាយល្បែងអនឡាញជាច្រើន ដែលមានទិសដៅអតិថិជនទៅកាន់ប្រទេសថៃ។

(ភ្នំពេញ)៖ លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានណែនាំដល់ម្ចាស់ស្ថានីយទូរទស្សន៍ក្នុងស្រុកទាំងអស់ ត្រូវបន្តពង្រឹងការផ្សព្វផ្សាយព័ត៌មានដែលមានគុណភាព ជាពិសេសកាត់បន្ថយព័ត៌មាន ដែលអាចជះផលអវិជ្ជមាន និងមានរូបបែបហិង្សាក្នុងសង្គម តាមរយៈការផ្សព្វផ្សាយនៅលើកញ្ចក់ទូរទស្សន៍។

ការណែនាំបែបនេះរបស់ រដ្ឋមន្ត្រីក្រសួងព័ត៌មាន ត្រូវបានធ្វើឡើងនៅរសៀលថ្ងៃទី៣០ ខែមេសា ឆ្នាំ២០២៦ នាទីស្តីការក្រសួង ក្នុងឱកាសអញ្ជើញដឹកនាំកិច្ចប្រជុំស្តីពីការគ្រប់គ្រងការផ្សាយព័ត៌មាន ជាមួយតំណាងម្ចាស់ស្ថានីយទូរទស្សន៍ ដែលទទួលបន្ទុកកិច្ចការព័ត៌មាន ដើម្បីពិនិត្យ ពិភាក្សា និងពង្រឹងប្រសិទ្ធភាពក្នុងការផ្សព្វផ្សាយព័ត៌មានឱ្យកាន់តែមានគុណភាព សុចរិតភាព និងទំនួលខុសត្រូវខ្ពស់។

រដ្ឋមន្ត្រី នេត្រ ភក្ត្រា បានថ្លែងថា ការផ្សព្វផ្សាយព័ត៌មានសន្តិសុខសង្គមជាច្រើន ដូចជាបទល្មើសឆក់ ប្លន់ ឃាតកម្ម ការធ្វើអត្តឃាត ជម្លោះប្តី-ប្រពន្ធ ព្រមទាំងបញ្ហាផ្សេងៗទៀតគឺមិនមានផលល្អដល់សង្គមនោះទេ។

លោករដ្ឋមន្ត្រីបានបន្តថា ការផ្សព្វផ្សាយគួរផ្តោតជាសំខាន់លើមាតិកា ខ្លឹមសារ និងរូបភាពឱ្យបានត្រឹមត្រូវ ចៀសវាងផលប៉ះពាល់អវិជ្ជមានដល់សង្គម រក្សាគុណធម៌ និងសីលធម៌ក្នុងវិស័យផ្សព្វផ្សាយព័ត៌មាន។

លោករដ្ឋមន្ត្រី នេត្រ ភក្ត្រា បានលើកឡើងថា ស្ថានីយទូរទស្សន៍ត្រូវបន្តអនុវត្តតាមវិជ្ជាជីវៈសារព័ត៌មាន ដោយផ្តោតលើការផ្សព្វផ្សាយព័ត៌មានដែលមានការទទួលខុសត្រូវ និងមានប្រយោជន៍សម្រាប់សង្គម ជៀសវាងមាតិកាដែលអាចបង្កការភ័យខ្លាច ឬឥទ្ធិពលអាក្រក់ដល់សាធារណ:ជន។

ជាមួយគ្នានេះ ក្រសួងព័ត៌មានក៏លើកទឹកចិត្តឱ្យមានការផលិតកម្មវិធីអប់រំ វប្បធម៌ និងព័ត៌មានវិជ្ជមាន ដើម្បីរួមចំណែកកសាងសង្គមដែលមានសុវត្ថិភាព និងអភិវឌ្ឍន៍ប្រកបដោយចីរភាព៕